近日香港嘅政治風波相信大家都知,好多人都話令唔少家庭決裂,分開兩個陣營,但其實對好多未成家嘅情侶而言都係一個考驗。近日有女網民就開Post,話自己同男朋友拍拖3個月,對方係警察;由於近日警民關係問題,遭到自己父母「強烈譴責」,要求分手。

女網民話自己今年30歲,2年無拍過施,3個月前先同呢位警察男朋友一齊,覺得對方對自己好好,而且都係30歲,大家都有共識係發展向結婚方向。好景不常,自上月開始出現政治爭議,繼而警民關係極為惡劣,社會上出現一班反警察嘅聲音;而自己父母正正係其中一份子。女網民話,父母有一日見佢返屋企食飯,斬釘截鐵同佢講「好仔唔當差,你好快啲分手,趁仲有時間搵過第二個」,仲話就算佢哋日後結婚,佢哋唔會出席!

女網民當然左右做人難,按道理係應該尊重父母,但好多時候婚嫁大事都係自己最重要,所以都心大心細。唔少網友都同意,話自己感覺最重要,應該自己決定自己嘅幸福,但同時要有最壞打算,就係等如無咗父母,如果女網民決定係繼續的話,就請有呢個心理準備。

其實每個人都唔同,縱使差人感覺形象好差,可能父母都要畀少少時間自己去認識下自己個女揀嘅呢一位,要對自己個女嘅眼光有信心,係嘛?

廣告